«·´¯`·»¦« Ye Dard Batane Wale Bhi Kis Shaan Ke Khush Guftaar Huay «·´¯`·»¦«

ÑiDØ_KiDØ Fri Dec 03, 2010 9:14 pm

Kyun khalwat-e-gham mein rehte ho, kyun gosha nashee.n bekaar huay
Aakhir tumhain sadma kya pohancha, kya soch ke khud azaar huay

Kyun saaf kushadaa rastoo.n per tum thokarein khaate phirte ho
Kyun teera-o-taar si galiyou.n main tum aa ke khush-raftaar huay

Kyun rasta chor ke chalte ho, kyun logou.n se katraate ho
Kyun chalte phirte apne liye, tum aap hi ik dewaar huay

Kya uth'te beth'te sochte ho, kya likhte parhte rehte ho
Iss umr mein ye be-kaifi kyun, kis waste naik atwaar huay

Kyun aise safer pe nikle ho manzil nahi jis ki koi bhi
Kyun rah pe aisi chalte ho, saaye bhi jahan dewaar huay

Kyun tark-e-alaiq ko tum nr samjha hai ilaaj-e ghum akhir
Dekho to wali sufi bhi yahan kis thaath ke dunya daar huay

Mayoosi-e-paihum se tum ne yarana ye kaisa ghantha hai
Andoh alam they jitne bhi, akhir woh galle ka haar huay

Iss kalba-e-ehzaa.n se hargiz, ubhre ga na suraj koi bhi
Kab khaak sitara baar huee, kab saaye sehr asaar huay

Kab subha ke naale kaam aye, kya giryaa-e-neem shabi se mila
Iss qarya-e-khwaab-e faroshaa.n main tum kis k liye bedaar huay

Bekaar ulajhte rehte ho kyun ulti seedhi baatou.n mein
Ye marhale vasl-o-hijraa.n ke ab aise bhi kyun dushwaar huay

Uss kooche ki raah to samjhao, jis kooche main jana mushkil hai
Uss shakhs ka naam tu batlao, tum jis ke liye bemaar huay

Mashfaq ne ye baatein sun ke kaha, baatein na huee.n ashaar huay
Ye dard batane wale bhi kis shaan ke khush guftaar huay

Sad shukar ke khush asloobi se takmeel ko pohanchi ruswaii
Mohtaaj-e-dua they jo khud hi aakhir wo mere gham khwaar huay

«­·´¯`·»¦« Ye Dard Batane Wale Bhi Kis Shaan Ke Khush Guftaar Huay «­·´¯`·»¦«